Werleman ta conta di un hoben adolescente, cu tabata desprecia su mes, cu a haya recomendacion pa haci un revision psicologico. No solamente e ta keto y indiferente, pero su autoestima ta hopi abou. Ambos di su mayornan ta profesional di funcion halto cu orario di trabou masha ocupa. E obhetivo di e tata tabata pa traha mas duro cu ta posibel, pa por retira cu pensioen prome cu tempo. Pero mientrastanto, no tabata sobra tempo pa realmente duna atencion na e adolescente, cu tabata pasa ful su tempo na cas, scondi den su camber. Ni sikiera e tabata sa ki tipo di trabou su mayornan tabata tin, ya cu e famia no tabata tin e momentonan special hunto y no tabata tene e combersacionnan vertical cu otro.

E psicologo a bisa e tata, cu mira den futuro ta hopi bon, pero e no mester lubida di biba e presente y duna atencion na su yiu, cu den algun aña tambe por bay. “E tata tabata asina concentra riba su hubilacion, cu e no tabata tin tempo pa duna su yiu e mihor atencion y amor, cu e tabata tin mester.”

E tipo di economia cu Aruba tin, tampoco ta yuda. E industria di turismo ta caracterisa su mes pa mas o menos nuebe (9) ora di trabou, seis (6) biaha pa siman, mas trahamento di warda, loke por ta un desafio pa lanta e muchanan, Werleman ta indica. “Aki ta unda maneho mester drenta e wega. E companianan aki mester ta capaz di proporciona espacio y flexibilidad na e mayornan, pa nan por atende e necesidadnan di e muchanan sin tin yen di stress den e proceso.

Por ehempel, e doñonan di trabou por asigna tempo pa e mayoran asisti na e actividadnan extracuricular di nan yiunan of hiba nan yiunan na e citanan medico. Y lo ta genial, si tin e sesionnan tocante criansa di nan yiunan na trabou tambe. Empleadonan feliz cu ta mayornan feliz ta lanta muchanan feliz.” Dorilis Werleman ta admiti cu e embergadura por parce aplastante. “Pero nos lo traha basa riba e solucionnan y di un forma cu por mira esakinan, nos mester atende un caso cada bes. Eventualmente, nos lo yega eynan.”

E señalnan di negligencia emocional ta ausencia, abandono y amor dentro di famia. Por ehempel, ora cu un mama ta laga of ta recoge su yiu na scol sin ni sikiera dun’e un brasa of un sunchi. E mayornan por asisti na e anochinan pa mayor y maestro, pero ta keda keto of ta desinteresa; por felicita e yiu pa un bon rapport, pero no ta bay mas leu cu esey; nan no ta nota e cambionan sutil den e forma di bisti di e mucha; of si e mucha ta un poco nervioso of tristo. “E mayornan kisas ta haci e tareanan funcional y formal, manera e dinamica di enseñansa, pero sin gesto espontaneo, caluroso y personal na e mucha.”

E mayornan cu no por brinda atencion emocional, tin e tendencia di haci pregunta superficial of pregunta horizontal, sin mishi cu loke e mucha ta sintiendo. “Por ehempel, algun mayor ta pidi pa e resultadonan di scol y ta duna como conseho, pa haci mihor si e mucha ta fayando. Pero e mayornan cu ta emocionalmente distante, no ta presiona y no ta puntra pakico e mucha ta fayando.” Esakinan ta pregunta di profundidad of pregunta vertical.’

Dorilis Werleman no ta culpando ningun hende, particularmente pa e fenomeno aki. “Si e persona aki nunca no a siña con pa come berdura, ora e tabata mucha, e no ta bay come esakinan tampoco como adulto. Si e persona aki no a haya un guia con pa expresa su emocionnan como mucha, ta bira hopi dificil p’e haci esaki como un adulto. Pues ta un problema di generacion pa generacion.” Un trabou cu carga pisa, e relacionnan kibra y stress tambe ta contribui na falta di e atencion adecua cu e muchanan. “E mayornan mester ta presente pa nan yiunan. No solamente fisicamente.”

Y loke ta hacie mas dificil pa compronde ta, cu e muchanan no sa of no ta sinti loke nan tin falta di dje, pasobra nan no sa kico ta loke nan mester ricibi. Abuso emocional ta mas tangibel. “’Kico nos ta haciendo robes?, ta e reaccion cu algun mayor ta duna. Nos no ta haciendo nada. Nos ta provee cuminda, paña y educacion. Kico mas nos mester haci?’ Loke nos ta bisa, ta exactamente e problema, nos no ta haciendo nada riba e nivel emocional.”

E muchanan mester di alimentacion y cuido fisico, pero tambe nan tin mester di siña controla nan emocionnan, pone atencion na nan mes y traha riba e relacionnan. E mayornan mester mustra nan yiunan con, p’asina nan aplica e habilidadnan ey ora nan ta adulto. E habilidadnan emocional ta mes importante cu e habilidadnan linguistica. E muchanan tin mester di comunica y desaroya e habilidanan social, pa yuda nan mes como mucha, pa despues como adulto, controla nan emocionnan pa pasa door di nan relacionnan mihor. Den otro palabra, e mayornan ta esunnan cu mester educa e mucha di ta consciente di nan ambiente social, con pa haci pregunta, con pa ta independiente. “E negligencia emocional ta afecta particularmente e desaroyo di e habilidadnan emocional y social, cu ta necesario pa hiba un bida pleno.” Di acuerdo cu literatura ta masha comun cu e sobrevivientenan di negligencia emocional ta mas ambel y empatico cu nan amigonan y famia, pero insensibel ora ta trata di nan mes. Enfocando riba e necesidadnan di otro y lucha pa fiha e limitenan, por ta señal cu nan ta carece di tin compasion cu nan mes.

Negligencia emocional ta diferente cu abuso emocional. Ambos ta forma di maltrato di mucha, pero e abuso emocional ta diferente, ya cu e ta un accion, manera yam’e pa nomber of insult’e. Negligencia ta un falta di accion; simplemente ta ignora un mucha. Ta un falta di reconocimento di e mucha. “Si un mayor insulta e mucha, ainda e ta reconociendo e presencia di e mucha y aunke insulto no ta algo saludabel, tin un intento di e mayor pa educa e mucha” segun Werleman ta splica. “E negligencia emocional ta significa cu e mayor ni sikiera ta purba.” Werleman ta enfatisa cu, sinembargo, ambos forma di abuso emocional ta perhudicial pa e desaroyo di e mucha.

Un mucha trankil den klas por ta un soño di un maestro, pero e por ta tambe un anfitrion di un mirada di emocion cu no a keda expresa, incluso un emocion inexplicabel. E mucha aki por ta un victima di negligencia emocional, un di e formanan mas impactante di maltrato di mucha, cu ta laga su marcanan pa bida largo.

Esaki ta un resultado di un cultura, unda kisas ta wak e muchanan, pero cu no ta scucha nan, un cultura den cua e psicologo, Dorilis Werleman, ta dicidido pa cambia, un persona cada bes. Werleman ta dirigi su propio practica di psicologia y tambe a lidera e implementacion di Codigo di Proteccion den e sector hudicial. “Un descuido emocional ta obstaculisa e mucha di siña e habilidadnan y capacidad, pa mantene un relacion saludabel cu otro persona pa enfrenta bida.”

Mientras abuso emocional hopi biaha ta reconocibel, negligencia lo ta mucho menos. Negligencia emocional por causa un autoestima abou, problema pa regula e emocionnan, falta di habilidad di aprendizahe, falta di habilidad di comunicacion y di relacion pa confronta bida. Asina ta, sea alerta si e mayornan tin solamente un interes superficial cu nan yiunan, Dorilis Werleman ta bisa.