Mi ta un soñado, un creyente y un creador. Mi ta convenci cu trahando hunto y di un manera conforme y structural a traves di e Codigo di Proteccion, pocopoco pero sigur, manera e mangelnan cu ta rond di nos isla, ta absorba e olanan fuerte di e desafionan social y eventualmente cambia e rumbo pa crea un piscina trankil, cla y sigur pa nos yiunan crece, siña y prospera. Nan merece esey.

Hopi cos a keda haci cu e apoyo di e profesionalnan. E toolkit digital di e Codigo di Proteccion ta keda desaroya pa formado, supervisor y profesional. E toolkit ta yen di conocemento, conseho, video y ehercicio pa duna sosten na e profesionalnan di e cuatro sectornan, a base di e temanan cu a surgi riba tereno trahando cu e Codigo di Proteccion. E toolkit ta desaroya pa Fundacion Augeo den colaboracion estrecho cu e grupo di contenido Arubano, Departamento di Mucha y Hoben, Gobierno di Aruba y UNICEF di Hulanda y co-financia pa Union Eurpeo.

Pa mas informacion bo por bay riba e website di www.codigodiproteccion.com.

Den luna di juni di aña 2022 Clementia Eugene, PhD-candidate cu colaboracion di e ekipo di e Codigo di Proteccion, a haci un encuesta pa evalua y midi e conocemento y experiencia di e profesionalnan den cuatro sector; salud, educacion, husticia y social cu e implementacion di e Codigo di Proteccion. Pero tambe nos kier a obtene e puntonan di referencia pa mehora e calidad di e Codigo di Proteccion, como tambe aumenta y garantisa e proteccion y siguridad di nos muchanan na Aruba.

E diescinco añanan cu mi a pasa como docente, trahando particularmente na scol secundario na San Nicolas, a keda marca pa e comprension di hopi desafio socioeconomico cu e famianan ta exponi. Pero mi a siña tambe cu ora haci cambio na e forma cu nos a siña y nos ta acerca nos studiantenan, nos por haci e diferencia. Esaki tabata rekeri pa tin un mente habri y e voluntad pa adapta como profesional. Nos mester di otro mutuamente pa garantisa e sostenibilidad di e cambionan positivo cu por garantisa un ambiente safe pa e muchanan. Nos mester confia otro. E profesionalnan, e mayornan, e red social y tur esunnan cu ta involucra, mester traha hunto pa yega na un obhetivo, esta, cu e muchanan por recupera di un manera sigur di e experiencianan adverso como mucha y desaroya di un manera sigur y protector. Semper ta bay tin e situacionnan den cua e aporte di algun di nos tin cu ta na largo plaso, incluso permanente, pero sa cu bo no ta bo so den e biahe aki.

Esaki ta exactamente e obhetivo di e revista, Asertivo. Como profesionalnan, nos tin e tendencia na sinti nos mes nos so, sinti nos mes abandona pa enfrenta cu e situacionnan masha compleho. A traves di e revista, Asertivo, nos por comparti nos historianan, e mihor practica, conseho y un gran cantidad di informacion cu nos ta recompila di nos trabou diario. Tambe ta ora di papia di e exitonan, sin keda pega den e aspectonan negativo. Como profesionalnan nos ta haci hopi, pero hopi biaha nos no ta tuma tempo pa mira atras riba tur nos logronan, specialmente e exitonan obteni ora cu nos traha hunto, cabes cu cabes, na luga di ta separa of tin biaha, hasta contra otro.

Realmente nos tin mester di un comunidad pa cria y proteha nos muchanan. Y mas informa nos comunidad ta, mas asertivo y resiliente nan ta bira, mas capaz pa brinda siguridad pa nos muchanan por prospera.

Semper mi tabata convenci di e necesidad di un cambio dentro di nos sistema nacional, pa defende e derechonan di e muchanan mihor. E urgencia di e cambio aki tabata bastante cla pa tur hende despues di e asesinatonan tragico di e mucha homber di cinco aña y su ruman homber chikito di tres aña na man di nan padrastro na aña 2017. E tragedia di e drama familiar aki en particular a pone na cla e deficiencianan den e structura existente, cu ta diseña pa yuda e famia lucha contra e trauma, cu a conduci na violencia y abuso.

Nos no ta nos so mas riba e caminda aki