Den nomber di e Gobierno di Aruba y e Ministerio di Husticia y Asuntonan Social, nos ta masha agradecido como tambe na tur profesional, trahando indiscutiblemente duro cu determinacion pa e bienestar, siguridad y proteccion di nos mucha- y hobennan. Tambe nos kier gradici ful e ekipo di Codigo di Proteccion, cu tabata trahando sin descanso for di november 2019 pa ehecuta e ley di un manera structura. Como ultimo, masha danki na tur profesional y e ekipo tras di e revista aki; Departamento di Mucha y Hoben, Fundacion Augeo, UNICEF Hulanda, cu a yuda contribui na e prome edicion digital di e revista aki.

E Codigo di Proteccion ta traha cu hopi di e colaboradornan interesa, un di nan ta e Departamento di Mucha y Hoben, cu actualmente ta traha pa haci e programa uno sostenibel, mediante e creacion di un plataforma specifico pa e supervision di e Codigo di Proteccion, den cua e obhetivo ta claramente señala. Tin plannan pa crea un organisacion di union, pa sigura y ancra e Codigo di Proteccion. Di manera aki por transmiti informacion y conocemento, pero tambe pa brinda recapacitacion y training adecua na e supervisornan di e Codigo di Proteccion.

Cu e fin aki, Minister di Husticia y Asuntonan Social a pidi UNICEF Hulanda y e Asociacion Hulandes pa Violencia Domestico y Maltrato di Mucha (LVAK) pa traha hunto cu Departamento di Mucha y Hoben pa desaroya un plan pa un centro di experticio pa e lucha contra e abuso di mucha y di violencia relacional.

For di prome di april di aña 2021, a base di e buki di legislacion 1, articulo 243 di “Burgerlijk Wetboek” di orden nacional cu ta contene e medidanan general (“National Ordinance Reporting Code Child Abuse”), tur profesional cu ta traha directamente cu mucha tin e obligacion pa uza e Codigo di Proteccion, na e momento cu nan tin un sospecho di abuso di mucha.

Uzando e cinco pasonan di e Codigo di Proteccion, e profesionalnan por expresa nan preocupacionnan, basa riba e hechonan, e mayornan y e tutornan di e mucha tambe por papia cu e mucha, ora cu ta necesario. Danki na Codigo di Proteccion, tur e profesionalnan por traha awor na un forma preventivo, uzando un sistema mas uniforme na ora di tramita nan sospecho di maltrato di mucha.

Gobierno di Aruba y Ministerio di Husticia y Asuntonan Social tin Codigo di Proteccion como un prioridad den su agenda. Esaki ta un prioridad desde e comienso di Gabinete Wever-Croes 1 na aña 2017.

Un porcentahe alarmantemente halto di mucha na Aruba ta experiencia abuso. Esaki ta rekeri accion, manera con pa educa e mayornan tocante e prome indicacionnan di tur tipo di abuso, empodera e muchanan y empodera e mayornan den nan habilidad di mayor. E Codigo di Proteccion ta contene e strategianan pa pone un fin na violencia contra e muchanan, incluyendo e aplicacion y cumplimento di ley y e reglamentonan relaciona cu maneho pa denuncio di abuso di mucha. Cu e revista aki, nos kier inspira tanto e profesionalnan cu ta traha cu e muchanan como tambe e profesionalnan cu traha cu e mayornan.

Laga nos ta asertivo y fortalece nos comunidad